أحـــــــلام حـــنان (3)

فجأة توقفت بطة

حنان انا جعانة جعانة قوووووووي

وانا كمان يابطة جعانة هموووووت من الجوع

طب يالا البسي بسرعة عزماكي علي احلي طبق كشري من عند الملك بمناسبة سماعنا لاحلي خبر في الدنيا

حنان بفرحة

ثواني وأكون جاهزة

وقبضت اليد علي اليد وعانقت الاصابع الاصابع وجاء الطعام المغموس بحبات الامل والحب

بحبك قوي ياحنونة انتي احلي حاجة عندي في الدنيا

وانتي كمان يابطة دنيتي كلها لولاكي ولولا وجودك في حياتي كنت اتمنيت الموت بطة انا عاوزة اعيش عشانك عاوزة اعيش واردلك جمايلك الي مغرقاني بيها

بطلي عبط ياعبيطة جمايل ايه هو في بين الاخوات جمايل انتي مش عارفة غلاوتك عندي ولاايه يافقرية

بطة انتي حرمتي نفسك من كل حاجة عشاني مرتبك كله رايح علي علاجي مفكرتيش تشتري فستان جديد لنفسك بدل القديم الي مابقاش نافع ولاجزمة جديدة بدل الي دابت

ياهبلة اسكتي وكلي كولي انا اجمل لحظة في حياتي لما بقبض مرتبي واشتريلك الدوا بحس ان انا المريضة وانا الي هخف سيبك مني ياحنونة وقوليلي يالا بتحلمي بايه لبكرة بقي

شردت حنان لبعيد

بحلم اني اكون بنت عادية زي كل البنات أحب واتحب

بحلم ببيت صغير وانسان صادق يحبني ويخاف عليا

بحلم بطفلة جميلة اسميها بطة تقولي ياماما

بحلم بيكي يابطة

ضحكت بطة

بتحلمي بيا انا ازاي بقي؟؟؟؟؟؟؟

بحلم بيكي هانم في بيت كبير وخدامين حواليك وانتي عمالة تشخطي وتنطري فيه

ههههههههههه

طب اصحي ياختي وفوووووووقي يالا نروح احسن الوقت اتأخر

يالا يابطة

وقريبا من منزلهم وجدوا ازدحاما ملحوظا

حنان ايه ده ايه الزحمة ديه في ايه ياتري استر يارب استني هنا هروح اشوف في ايه بسرعة وارجعلك

دخلت بطة في وسط الزحمة

في ايه ياجماعة

ست واقفة من الحارة

دي ام حسن بتاعة الفجل

مالها خير

جالها خبر ان ابنها عمل حادثة في الطريق

ياستار يارب طب وهو فين دلوقتي

ولاد الحلال نقلوه علي المستشفي

ماتعرفيش انهي مستشفي بالظبط

مستشفي الامل الي انتي بتشتغلي فيها ينوبك ثواب في الست الغلبانة ديه خديها واديها لما تعرفش الطريق وهتموت من القلق علي ابنها

حاضر من عنيا ثواني بس

حنان بقلق

بطة في ايه خير

ماتقلقيش ياحبيبتي ام حسن ابنها عمل حادثة بسيطة ونقلوه المستشفي بتاعتنا هروح اوصلها بسرعة وارجع أحسن مش عارفة الطريق

طيب اجي معاكي

لالا مش هتاخر ماتخافيش اطلعي انتي عشان تطمني ماما

طيب لا اله الا الله

محمد رسول الله

يالا يا ام حسن بسرعة الاتوبيس واقف اهو

سلام عليكم ازيك يارضا (ممرضة النبطشية)

الحمد لله ازيك يابطة خير جاية دلوقتي ليه مش نباطشيتك يعني

لالا دي ام حسن بياعة الفجل عندنا في المنطقة ابنها عمل حادثة ونقلوه هنا ماتعرفيش راح فين

اه انا سمعت عن حادثة جت م من شوية هناك في الطواريء لسة موجود

طيب انا هروح اشوف يالا يا ام حسن

يالا يابنتي

أم حسن الدموع مغرقة عنيها

استرها يارب دانا ماحلتيش غيره

وجدوا حسن وصديق له جالسين علي كنبة في غرفة الطواريء

أم حسن بلوعة

حسن ابني حبيبي ايه الي حصلك يابني

حسن بضعف

اطمني يا اما انا بخير

اطمن ازاي بس يا ابني وانت دماغك بتنزف والدم مغرق وشك ياجماعة ياناس يالي هنا فين الدكاترة ابني بينزف ابني بيموت ومفيش حد يغيثه

الممرضة الموجودة في الطواريء

اصبري ياحاجة دكتور النبطشي لسة مجاش

لسة مجاش ازاي ابني بينزف حرام عليكم يابشر حد يغيثنا

وخرجت تصرخ علي الباب

بقسوة صرخت فيها الممرضة

ياحاجة ما انا قلتلك لسة مجاش زمانه في الطريق

بطة لحسن

انت هنا من امتي ياحسن

رد صديقه

بقاله 3 ساعات يا ا نسة ومن ساعتها محدش عبرنا خالص

ام حسن لبطة ودموعها مغرقة وجهها

بطة سايق عليكي النبي لاتشوفي حد من الدكاترة يابطة يابنتي دانا ماحلتيش غيره انا من غيره ولاحاجة

برقة وطيبة قلب

اهدي انتي بس يا ام حسن حاضر حالا هروح اشوف دكتور نادر

وبخطوات سريعة اندفعت بطة الي غرفة دكتور نادر في الدور الرابع أخر الممر

وبانفعال شديد دفعت بابا الغرفة وكانت المفاجأة

والبقية تأتي