(5)احنا بشــــــر مـــش كـــلاب

حنونة حبيبتي بتعملي ايه ياتري?

بطوطة بقرا ياسيتي كتاب اخدته من رانيا جارتنا اسمه أحلام الغد بس كتاب ايه راااااااائع بيقولنا ان من حقنا نحلم وان أحلامنا هتتحقق لو فكرنا صح ولازم نصبر ولو وقعنا ازاي نقدر نقوم ونفكر تاني وتالت و

لاحظت حنان شرود بطة عنها تماما

بطة مالك انتي مش معايا خالص في ايه ايه الي واخد عقلك ياجميل؟

حاولت بطة اصطناع الاهتمام

لالا معاكي وانتي بتحلمي بايه بقي ياحنونة ياجميلة؟؟؟؟

مددت حنان جسدها علي الكرسي وسرحت لبعيد

يوووووووه يابطة أنا بحلم أحلام كتيرة قوي بطة تفتكري هاتتحقق أحلامي؟؟؟؟؟؟؟؟؟؟

بطة يااااااابطة مش بتردي عليا ليه

ها... اه اه طبعا هتتحقق أومال ايه كل أحلامك هتتحقق وأكتر كمان أنا هادخل أنام بقي عندي شغل بدري ها هتنامي

لالا أنا مش هنام الا لما أخلص الكتاب الأول

طيب تصبحي علي خير

وقبلتها في جبينها

وانتي من أهله

في الصباح وفي الطريق للمستشفي قابلت بطة أم حسن في طريقها علي فرشة الفجل أمام العشة التي تقطن فيها فألقت عليها تحية الصباح

صباح الخير يا أم حسن

بشرود وحالة غياب عن العالم

حسن هو فين الواد ده

ياحسن

رد عليا ياحسن أنت فين

يالا عشان تروح شغلك

أم حسن مالك؟

مفيش يابطة بصحي حسن عشان يروح شغله

حسن مين بس يا ام حسن استهدي بالله

حسن ابني يابطة ياواد ياحسن قوم بقي وبطل غلبة المعلم هيبهدلك ياواد قوم

تساقطت الدموع من عيون بطة واندفعت بعيدا وصورة أم حسن أمامها تمزقها ولكن لم يعد يصلح الرجوع لابد من الاستمرار وما ان وصلت المستشفي حتي استقبلتها رضا الممرضة

بطة دكتور معتز في قسم التحاليل بعتلك عاوزك هناك

حاضر هروح له حالا

وما ان وصلت لقسم التحاليل حتي وصل الي أذنها صوت مرتفع من أمام معمل التحاليل ولاحظت زحمة شديدة وأصوات متناثرة غاضبة استطاعت أن تلتقط منها

والله حرام الي بيحصلنا ده

وميزت بطة صوت سيدة عجوز تصرخ

حرام بجد بقالي شهر دايخة عشان أصرف الحقنة ومش عارفة هموت ياناس هو مفيش رحمة

اه اه ااااااااااه ااااااااااااااااااااااه

وارتمت العجوز علي الارض فاقدة النطق

صوت يصرخ

ياجماعة حد يلحق الست

استطاعت بطة أن تقتحم الزحام

وسعوا ياجماعة وسعوا

ياحاجة فوقي فوقي ياحاجة ياجماعة

حد يطلب اغاثة بسرعة

تطوع أحد المرضي

منين الاغاثة منين؟؟؟؟؟؟

هناك اطلع الدور التالت وقلهم حالة اغماء تحت بسرعة اتحرك

تعالي صوت أحد المرضي من بعيد

أنا عاوز أعرف فين أوضة المدير حد يوصلني للمدير احنا هنسكت لغاية امتي علي المهزلة ديه كل يوم نيجي من الفجر عشان ناخد الحقنة يقوللنا بكرة بكرة ده كبد ياناس كبد انتم فاكرينا مرضي برد ولا كحة لو الحقنة مأخدنهاش في ميعادها هنمووووووت عمالين تسربوا الحقن وسايط وحبايب اتقوا الله فينا داحنا بشر مش كلاب

وبخبطات سريعة علي باب المعمل أخذ يطرق الباب بكلتا يديه بعنف وشاركه الكثير من المرضي ولم تمضي لحظات الا وامتلأ الممر بأمن المستشفي وبقوة وبعنف دفعوا المرضي وفي مشهد مأساوي لاينسي راقبت بطة مايحدث حولها وبذهول تابعت عيناها عملية تنظيف الممر من المرضي المتمردين واذا بصوت باب المعمل يفتح

وابتسامة دكتور عز تضيء المكان وبصوت عذب وجه ندائه لحارس الممر

خلاص يامحمود نزلتوهم

ايوة يادكتور كله تمام نزلوا ومابقاش في قلق

جايين يعملوا لنا ثورة في المستشفي أصلنا ناقصين عطلة مش كفاية الي ورانا

والتفت ورائه وجد بطة ورائه تنظر اليه بتعجب

وبنبرة صوت تحمل انتصارا

ايه ده بطة اهلا بطة تعالي ازيك انتي هنا من امتي؟

من شوية يادكتور

طب مادخلتيش ليه تعالي أهلا بيكي اتفضلي اتفضلي

ها ياسيتي أختك عاملة ايه دلوقتي ؟

أفضل يادكتور

طيب هتجيبها يوم الاتنين بقي ...ترررن ترررن...ثواني أرد علي التليفون

ألو أهلا أهلا دكتور نادر ازيك ياراجل فينك ولا بتسأل يعني ها ها ها أأمر ياسيدي 5 حقن لالا موجودين ولومش موجودين نقلب الدنيا ونجيبهملك ياباشا هاهاهاهاها ماشي انا في انتظارها هما جاهزين سلام سلام

وضع سماعة التليفون ثم نظر لبطة

أيوة يابطة كنا بنقول ايه اه يوم الاتنين بقي تجيبي اختك عشان التحاليل المطلوبة احسن دكتور نادر داوشني

بطة برعشة

حاضر يادكتور علي الساعة كام كدة

علي 10 هنكون في انتظارها

ماشي يادكتور استاذنك عندي شغل

ماشي اتفضلي

وزاد الألم علي بطة وزادت الأفكار وزادت التساؤلات أخذت الشكوك تتسرب الي قلبها كيف وكيف ..كيف أن طيبة القلوب تظهر عندها ؟...وكيف تخبو وتنطفيء عند غيرها بلارحمة؟ لابل وبابتسامة مرعبة وبقلب حجر أدمي قلوب مريضة وبنفس الوجه أظهر طيبة وانسانية عليها وعلي أختها كيف كيف

قررت بطة أن تصارح أختها بشكوكها ومخاوفها وأن تشاركها في ظنونها وما ان فتحت بمفتاحها باب شقتهم الا وتراجعت في قرارها بعدما رأت أختها مفترشة الأرض وبين يديها مروان ابن الجيران طفل جميل سنتين من عمره تلاعبه وتضحك معه ضحكات صافية جميلة وتطبع علي خديه قبلات حانية رقيقة

حنونة أول مرة يعني أشوفك بتلاعبي موني

بطة انتي جيتي ده عسول قوي يابطة

انا حبيته قوي

بقولك ايه انا هخده وانزل اشتريله حاجة حلوة من تحت بسرعة

طيب ماتغبيش ياحنونة

حنان بسعادة عارمة

هوي ماتخافيش

يالا ياموني هجيبلك شيكولاتة من تحت

وبكت بطة لم يستطع أن ينطق لسانها قررت أن تقتل الشكوك وأن تستمر الي النهاية فما رأت أختها في يوم ما أسعد كما هي اليوم غيرت ملابسها وتوضأت وفي غرفتها وحيدة صلت ورفعت يديها الي السماء داعية الخالق العظيم

اللهم انك تعلم اني احبها واني لاارجو من هذه الدنيا شيئا سوي اسعادها فاللهم نور طريقي ويسر امري ودلني علي الخير وارشدني ليه اشفيها واحميها واحفظها

وبكت بكاءا مرا

بطة بطة بطة....

خبطات علي باب الغرفة

والبقية تأتي